Song 3 | KYG | STEP | Hani'ilagamo hipa'nile'mo havae'ne'nae'mo nahau nayamopafi'mo ne'nahaiya veka'nie'mo kahauya hu'nova'monanafa o'age'nove.

Song of Solomon 3

1 Hani'ilagamo hipa'nile'mo havae'ne'nae'mo nahau nayamopafi'mo ne'nahaiya veka'nie'mo kahauya hu'nova'monanafa o'age'nove. 2 Nagaemo he ti'na taonifi'mo u'ne'na hu'na muki ka'ale'mo kahauya hu'na agegauve, hu'na nagesamo afi'nove. Nagaemo kahauya hu'nova'monanafa o'age'nove. 3 U'ne'na nehuge'apae'mo taonifi'mo u'e'a hu'a ne'yagaiya vaya'mogimo ne'nagage'nae'mo, Nahau nayamopafi'mo ne'nahaiya veka'nimo age'nafiye, hu'na apafi ge'nove.

4 Nagaemo apatale'na uvategamo malage hu'na ne'nahaiya veka'nimo age'nove. Nagaemo agaetegamo u'nae'mo agaemo natalesiyafe'mo o'nahau'nige'nae'mo anu ki'na mai'nove. O'atale'na avaleli'nu'na alino nate'niya ita'nimo'mo nehavaeya yapilagamo uta'a hai'no'ae. 5 Yulusalemu a'mafa'ne anagane, hu'na, lokiya gefati'mo hu'nae'mo, afela afumogimo koli hu'a apaune nehaya afu anaga'mogi nehaya agufa kavafe'mo lapakesamo afitetapa nahau nayamopafi'mo ne'nahaiya vekamo aupati'mo haunetapa o'ateyo. Agai'amo hau'ninageno aupati'mo he tigiye. 6 Ageyo. Ina la'mo yahaofilagamo ani'mo ohane'niya kotegati'mo haine ne'e. Maketileti'mo miya nefaiya la'nefamo atafi'mo nekaya afina'mo alagepa atumo ne'aigeno halina'amo'mo posigana huno hane'neno halinamo ailinuno nehaiya kava huno haine ne'e. 7 Ageyo, hu'na, Mago vaya'mogi Salomoni siamo alini'a ne'ae. Sigisiti'a Isaleli ati vaya'mo koli nosaya lokiya ati vaya'mogimo fai'a ku ai'a ateli'a ne'ae. 8 Muki vaya'amogimo kame nehaya kava'mo age'a alagepa hu'naya vaya'mogi naipe'apimo alini'a ne'ae. Hani'ilagamo afole ne'aiya kavafe'mo koli nehaya'mofe'mo naipe'apimo apalute'mo male'nae. 9 Kini vekamo Salomoni'a Lemanoni kotegati ali'naya alagepa yosaleti'mo alini u'e'a nehaya sia'amo mago aise nokana huno ki'niye. 10 Agaemo siluva yafateti'mo posi'amo alo huge goli yafateti'mo afe'alumelaga'amo alo huge huno alo huteno haesa lavolavoleti'mo aino ati kae male'niye. Yulusalemu a'mafa'ne anaga'aife'mo hau ayamopafi'mo hau'niya kavateti'mo yu'ilaga'amo alagepa huno alo hu'niye. 11 Saiyoni a'mafa'ne anagane, hu'na, lapakaemo etapa kini vekamo Salomoni'mo ageyo. Agaemo agenopale'mo kini kakolitamo hane'niye. Kini vekamo Salomoni'a a'mo ali'niya afina'mo lusi kava huno amogaga ai'nigeno'ae'mo ita'amo'mo ani kakolitamo alino agenopale'mo maleno ateteno kini vekamo lekana paino ate'niye.